0

Teihndusend Oostfresenutwiesen utstellt

Oostfreeske Böskupp weer in dree Spraken in’t Internet

Oostfreesland/Wereld. An d’ 21. Januarmaant hett de Oostfreeske Böskupp de 10.000ste Oostfresenutwies ruutgeven. Kregen hett hum en jung Froominske ut Weener in dat oostfreeske Rheiderland. As dat Gebruuk is bi süks’n Jubiläum, kriggt se daar en lüttje Ehrenmedaille för. Daarto gift dat nu de Internetsied van de Oostfreeske Böskupp weer in dree Spraken. Dat hele Wark is nu in de Lannesspraak Platt, up Dütsk un ok up Ingelsk to lesen. Bold de hele Sied is in Tokunfst weer mehrtalig. Dat gaff dat fröher al maal up de Internetsieden van de Böskupp, man achter en Umstellen van de Technik harr de Webstee en Tied lang blot een Spraak.Al siet 1997 gift dat de Oostfresenutwiesen bi de Böskupp van Oostfreesland. Toeerst harren de Böskuppslüü de Utwiesen mit hör egen Hannen tosamentütert. Man in d’ Loop van de Tieden is dat man good wat professionell woorden: Siet en paar Jahren könen de Utwiesen up de Webstee van d’ Böskupp beandragt und achteran van de Sied as en Datei för’t utprentjen daalladen worden.

In d’ Dezembermaant 2002 gaff dat mit dusend Lüü al mehr Minsken mit en Oostfresenutwies as de lüttjeste Staat van d’ Eer, de Vatikan, Staatsbörgers hett. Nu mit teihndusend Utwiesen kummt de Oostfreeske Böskupp mit grote Stappen an de Inwahnertahl van de Eilandstaat Tuvalu (12.000) hen. Düdelk meehr registreerde Oostfresen as dat lüttje Volk van den Korjaken (8.000) up dat Halfeiland Kamtschatka in Russland gift dat al. Nu maakt de Böskupp süks daar an, de Eilandrepublik Palau (21.000) un de lüttje Staat Sünner Marinus (30.000) to overhalen.

Man ok dat Umstellen up de Mehrsprakigheid is wat besünners. Dat Oostfreesk Platt gift dat as schreven Spraak noch neet so faken in’t Internet. "Dat Platt is för uns heel van Belang", seggt Onno Gabriel van de Böskupp. De Oostfresenutwiesen bünd al lang up Platt schreven. "In d’ verleden Jahren bünd wi sowat as en Fackstee för Oostfreesland worden, Lüü fragen uns bi mennig Saken na uns Menen, ok over’t Platt." Dat was een Grund mehr, de plattdütske Utgaav van de Internetsied weer intorichten. Daarto gift dat bi de Böskupp al siet Jahren en dütsk-plattdütsk Woordenbook mit wat 10.000 Indragens.

Man in’t Geheel is de Böskupp van Oostfreesland dat bleven, wat se bi hör Grünnen dör en paar Studenten was: En Anloopstee för al de Butenoostfresen up de hele Wereld. To finnen is de Böskupp van Oostfreesland in’t Internet unner http://www.botschaft-ostfriesland.de.

Comments

comments

Powered by Facebook Comments

Abgelegt in: Allgemein Tags: , , , , , , , ,

Get Updates

Share This Post

Related Posts

Leave a Reply

Submit Comment

© 9435 Ostfriesenblog.de. All rights reserved.